Saturday, 30 March 2013

  • 留學生亂咁遊 - 火車篇

     

    要係英國穿梭各大城鎮,可以選擇嘅交通工具有火車、旅遊巴士。遠程火車車費癲起上黎可能會超過60英鎊,如果無railcard就真係好溶。住得近機場的話真係可以考慮下搭飛機,分分鐘仲快/平過搭火車。

    Railcard係咩黎呢?其實係一張專比16-25歲搭客申請嘅卡,持卡者買火車票可以獲得車費1/3off優惠。當然,張卡係要俾錢買嘅,一年28英鎊或者三年65英鎊。如果你好喜歡四圍去,其實好快就回到本。

    因為火車票價錢太太太貴係一個無可能改變嘅所以事實,我決定呢一生都唔要因為自己嘅失誤而蝕俾佢⋯⋯

    以下文字集結左火車delay/cancel帶來嘅憤怒、弱智嘅失誤帶來嘅失望等等情緒。

    車長Check飛

    Railcard及Advanced ticket 

    火車車長會係車上檢查車票同railcard, 然後係車票上釘窿/簽名/打印/亂劃一筆/印浮雕,亦有部分車長會望下就算。

    一定要清楚自己買Advanced ticket定係Off-peak ticket定係Anytime ticket。Advanced ticket有指定日期時間(座位未必有),如果搭錯車,可能會被車長迫買過張車票,仲要係最貴果隻,搏唔過。有Railcard嘅千祈要隨身,如果同車長講唔記得帶,佢係唔會相信架。心虛想扮訓覺?如果扮訓技術唔高嘅話,真係唔好試,佢會係車卡上大聲叫醒你再責罵你⋯⋯再罰你錢。

    小心中伏 

    為左避免不必要嘅失誤,都係儘量做好準備。除左記得邊個站轉車,仲要記得接駁車開出時間。因為小型火車站嘅電子板只會顯示列車終點站、開出時間同月台號碼。你未必係搭到終點站而係沿途站,咁你就要知道你要靠開出時間黎揾月台。

    退款 - 上網買火車飛買錯時間,又或者揀錯取票車站?退火車飛嘅程序係好弱智架:首先你要持有果張買錯左嘅車票,於網上揾出火車公司地址,寄張車票俾佢地證明你無用過張車票。你以為你可以全數退回?唔好意思,佢地會扣除10鎊手續費。退款之前請計清楚是否值得為左一張車票搞咁多野,當然最好唔好買錯車票啦。

    從網上見到,亦問過火車站職員,都係咁答我

    Delay - Delay這回事係完全唔關天氣事,一年四季都會發生。如果直接到達目的地就遲少少都無問題;如果要轉車而原本轉車時間又只有五分鐘 - 請你轉車時立刻揾牌揾月台,如果唔係你分分鐘要呆等半個鐘,夜少少仲會無車添。

    當你準時上到車,火車準時開出,你會諗住坐定粒六實無衰唔會遲到啦。上星期我出發去Birmingham嘅車上就好無辜咁遲左15分鐘,連理由都無個。曾經有一次我要去倫敦,火車delay左一個鐘,我就咁就呆等左一個鐘。

    Cancel - 特別係冬天落雪嘅日子,火車會因為路軌結冰而取消。
    其他日子亦會出現隧道爆水管、電纜斷左等等問題。如出現以上問題請向車站職員查詢,佢會答到你有咩其他方法搭去目的地。

    因為大雪而火車軌被雪埋左

     

    火車真係乜人都有

    搭火車好玩之處就係睇景同睇人。個人認為北部/蘇格蘭風景比較怡人,中部嘅好似去到邊都係差唔多樣。

    如果你有機會夜晚坐上來往曼徹斯特Manchester的火車,就好睇囉。Manchester其中一樣出名嘅當然係球隊同Old Trafford球場。好多人都會專誠去睇波,而有部分仲係醉酒人士。當你坐上那火車時,可能會遇到以下情況:

    被醉酒人士手中嘅啤酒淋中
    醉酒人士搭訕
    有當日比賽嘅兩隊球隊之球迷嘈交
    成個車卡都係同一隊球隊之球迷,然後全卡一齊慶祝同唱歌

    雖然我對足球零認識,不過遇到全車唱歌當晚,氣氛超好,企一個鐘都唔算難過。

     

    我乘搭得比較密嘅Virgin Train係幾文明嘅,部分路線嘅火車有提供插座。
    座位都頗舒適


    大家又有搭火車tips嗎? 

About the Author

Who recommended?