Monday, 25 March 2013

  • 誰要賤買你的理想了?


    courtesy of Ana Luísa Pinto [Luminous Photography]

    最近(其實都個幾月之前了)記者朋友的 facebook 瘋傳一篇文章,內容是一個未畢業的傳理大學生大呼傳媒界人工太低令他怕怕,又叫各傳媒公司老闆不要用錢抺殺理想云云。總之文章的結語就是,因為你人工俾得太低,抺殺我所追求的理想,所以我唔入行,完。原文在此

    細路仔未入行就呻,當然係死罪一。不過都不排除佢地的師兄師姐平時在 facebook 或者分享時大講呢行人工如何低,耳濡目染。其一可能真係低,其二點都有少少「扮謙」的成分存在,你幾時會見過人在 facebook 又或者分享會上面,話自己人工好高?

     

    我入行三年,唔怕講,人工萬五。話低,大把人畢業三年都低過我;話高,高過我既人亦都有如恆河沙數。老細級果啲六位數唔好講,我先講自己呢幾年聽過既人工故事。

    俾啲背景資料大家,傳媒有台電視台有網站有報紙雜誌,大家聽得最多的電台電視台,唔同公司可以好唔同。有一間可以凍薪幾年,做到高記都仲係萬二;有啲論功行賞,有個同學底薪低過我少少,不過而家有埋出鏡費,一個月人工可以 double。電台,有個大我一年既行家,上兩年俾網站用萬八蚊撬走;其他年資同我一樣,都係萬二萬三徘徊咁啦。

    跟住聽得最多就係報紙,幾個去到廿八三十既行家都係萬八,不過入場時間就好唔同,一個都係早我一年入行;另一個最近又跳船,唔知加左幾多。雜誌恕我唔知,只係聽過有個雜誌行家入左行幾個月跳槽,舊鋪加到佢萬六黎留佢。

     

    可能你會話,車,萬幾姐,有幾高?咁當然睇下你同咩比啦,你要同 ibanker 同醫生律師比,咁唔好話記者啦,有幾多份工可以去到佢地果啲級數?

    當然,傳媒公司老闆剝削既度,要幾離譜真係可以有幾離譜。上面講過高記都仲係萬二,好明顯就係極度 hihi 例子之一,最後班高記亦都一個個走晒,證明你唔出錢人地就出山。

    不過呢行仲有一樣生態,就係海鮮價。坐你隔離同你差唔多年紀果個,人工可能高你三成有多。你可能會問,咁佢係咪勁好多先?一黎啦,公司驚你走,咪勁加你人工黎留人囉。有個行家做左同一間公司幾年,覺得係時候要走,其中一個原因係每年調整時加得佢幾個 %,結果俾人勸留左之後一炮加成廿幾個 %,無得恨。

    草裙舞有風險,另一條加薪大道就係跳槽。當然做得好地地唔駛跳,自己敲門都係差啲,呢行流動性實在太勁,一有人唔撈就開始 play music,點解?玩 music chair 囉,一個拉一個,另一個又補返果個位。傳媒最好就係成日跑,容易響朵,見到樣或者出到你個名又更好,於是被撬幾近成為常態。

     

    講到呢度,如果做左好多年人工都仲係低到令人心灰意冷,即係:你老細實在太衰,咁你應該走啦。走唔到?點解無人要?又點解無人撬?

    待遇有千千萬萬種,我講呢個原因唔係唯一,不過唔排除有種人就係:你唔係好標青囉。

    果啲人嘈,都有啲道理,不過責任你本人都有少少;未入行就嘈,就真係要講句:唔 x 係呀?

     

    好好好,再講份人工本身。萬幾萬幾都係廢話,夠唔夠洗先?

    我自己本身無買樓,仲要係月光族,所以真係講唔到啲乜野 insight。咁講啦,我有同學係旺角買左樓,淨係計供樓唔計其他野,每個月供七千幾,首期就係佢老豆老母俾既。係咪個個都有幫你俾埋首期咁好既雙親?我唔敢講,不過我唔少朋友身家都有六位數(係佢地理財有方定係我太失敗?哈哈),等到你三十歲先買樓好未?三四十萬都有掛。

    再講養家,可幸我老豆老母未退休,唔駛等我養,但係我每個月都要進貢三四千回宮,唔少喇掛。咁我預你每樣多啲,每個月洗費都係萬二三姐,都仲有千幾二千俾你洗喎,人工萬八果啲仲好,有三四千。唔夠洗?咪好似我咁,唔好買樓住囉。

     

    總之... 人工呢樣野,高處未算高,比下又一定有餘。唔滿意咪去做擺明高薪既工囉,唔好講到理想被抺殺咁誇張。我唔係話剝削人工呢樣野係啱,唔係叫大家慣左佢,但又真係唔係特別差喎。講真,有幾多記者做到住豪宅渣靚車?唔好話記者,咩工都好,俾錢係買你能力,鬼要你理想。

     

Who recommended?